मोती जयन्ती तथा साधारण सभा ,(खसखस सम्वाददाता )
मोती जयन्तीमा गजल प्रतियोगिता र वाचन कार्यक्रम हुने
खेमराज गाउँले, रोल्पा भदौ ५ ।
१ सय ४८ औं मोती जयन्ती मनाउनको लागि रोल्पामा मूल समारोह समिति गठन गरिएको छ । राप्ती साहित्य परिषद् जिल्ला शाखा, ललित साहित्य परिषद्, जलजला साहित्य परिषद्, विश्व नारी नेपाली साहित्य सम्मेलन अञ्चल समारोह समिति र जिल्ला समारोह समितिको संयुक्त आयोजनामा यस वर्षको मोती जयन्ती मनाउन लागिएको हो ।
यही भदौ २० गते कार्यक्रम सम्पन्न गर्नका लागि गायत्री घर्तीमगरको संयोजकत्वमा ११ सदस्यीय मूल समारोह समिति बुधबार लिबाङमा गठन गरिएको हो । समितिका सदस्यहरुमा डी.बी. टुहुरो, ओम पन्छी, कविता उपाध्याय, भगवती बुढा, दीपेश पराइ विष्ट, खेमराज गाउँले, देवी गुरुङ, दिलकुमारी बुढामगर दिलु, केवी विरही र मोहन परियार रहेका छन् ।
विश्व नारी नेपाली साहित्य सम्मेलन राप्ती अञ्चल समारोह समितिका संयोजक गायत्री घर्तीमगरको अध्यक्षतामा लिबाङमा सम्पन्न बैठकले १९ गते लिबाङमा खुल्ला गजल प्रतियोगिता सञ्चालन गर्ने र २० गते खुल्ला गजल वाचन कार्यक्रम आयोजना गर्ने निर्णय गरेको छ । त्यस्तै कार्यक्रम सम्पन्न गर्नका लागि भगवती बुढामगरको संयोजकत्वमा आर्थिक व्यवस्थापन उपसमिति, नवीन लोचन मगरको संयोजकत्वमा मञ्च व्यवस्थापन उपसमिति, मोहन सहयात्री परियारको संयोजकत्वमा सांस्कृतिक उपसमिति र देवी गुरुङको संयोजकत्वमा प्रचारप्रसार उपसमिति गठन गरिएको छ ।
खुल्ला गजल प्रतियोगितामा प्रथम हुनेलाई २ हजार, द्वितीयलाई १५ सय, तृतीयलाई १ हजार, सान्त्वना हुनेलाई ५ सय नगदसहित प्रमाणपत्रको व्यवस्था गरिने प्रचाप्रचार उपसमिति संयोजक देवी गुरुङले जानकारी दिनुभयो । मूल आयोजक समितिको बैठक १५ गते बस्ने निर्णयसमेत भएको छ ।
ललितको साधारणसभा असोजमा हुने
समाचारदाता, भदौ ५ गते ।
ललित साहित्य परिषद् रोल्पाको वार्षिक साधारणसभा आउँदो असोजमा हुने भएको छ । बुधबार लिबाङमा सम्पन्न बैठकले परिषद्को १३ औं साधारणसभा असोज ५ गते सम्पन्न गर्ने निर्णय गरेको हो ।
परिषद्का अध्यक्ष ओम पन्छीको अध्यक्षतामा बसेको बैठकले संस्थागत प्रतिवेदनको लागि महासचिव केवी विरहीलाई र आर्थिक प्रतिवेदन तयारका लागि कोषाध्यक्ष दिलकुमारी बुढामगर दिलुलाई जिम्मा दिएको छ ।
यस्तै परिषद्को नविकरण गर्नका लागि अध्यक्ष पन्छीलाई जिम्मा दिइएको छ भने बालकृष्ण आचार्यलाई लेखापरिक्षक तोकेको महासचिव केवी विरहीले जानकारी दिनुभयो ।
बैठकले जिल्लामा क्रियाशील साहित्यिक संस्थाहरुसँग समन्वय गरी १ सय ४८ औं मोती जयन्ती मनाउने निर्णय गरेको छ ।