हालसालैका लेखहरु : ग्रीन कार्ड,(सुदीपभद्र खनाल) लश्कर,(गोविन्द गिरी प्रेरणा) अभिनन्दन !!!!,(ऋषिराम अर्याल) गड्यौला उर्फ सत्यराज ,(कृष्ण बजगाईं ) बोर्डरसाइटको बब्लु,(नीलम कार्की निहारिका) समुद्र र सपना,(संजु बजगाईं ) कार्लोस मेरो दर्पण छायाँ,(सुन्दर श्रेष्ठ) मैले नजन्माएको छोरो,(पारिजात) विदेसिनु रहर कि बाध्यता,(जेबी खत्री) ना....टक,(बासु श्रेष्ठ )

सुनामी र साक्षी

मल्लिका शाक्य, (हाल: प्रिटोरिया, दक्षिण अफ्रिका )

 
सखारै

श्रष्टा धर्ती

आँगन बढार्छे

नित्य झैं

बस् संकोचको बर्को गायब छ आज

स्वाभिमानले ओतप्रोत

बरु छिन् स्वतन्त्र-प्रज्वलित

 

अनि हेर्दाहेर्दै

ताण्डव थाल्छे धर्ती

भयानक आत्महन्ता

विनाशकारिणी

स्वामी भनाउँदाहरु

अवाक् छन्

धर्तीको प्रलयगर्जना

सीतावतारमा मेरो राम होस् तँ

मर्दिनी हुँदा महिषासुर

छस् तँ मायाको भुलभुलैयामा

र म नै हुँ महामाया |

 

धर्ती बक्रमुख पार्छे

गाला फुक्छे

आङ डोलाउँछे

भीषण आर्तनादसहित

आगो ओकल्छे मुखबाट

अनि

पछारिन्छे

र छाड्छे एउटा लामो निश्वास

सु...ना...मी...

 

एउटा भन्छ - त्यसलाई कजाउन पुगेन

अर्को भन्छ - चरित्रहीन

तेस्रो भन्छ - स्त्रीहठ

 

म एक्लो साक्षी उनको

झीनो फिस्टे अम्बलुला

प्रशान्त गहिराइमा

जटायु भएर

बयान दिइरहेछु

हो - यस्तै थिइन्, यतैबाट गइन्

र मलाई भनेर गइन्:

मेरो साक्षी होस् अम्बलुला तँ

बाँचेस् र बोलेस्

अनादिदेखि अनन्तसम्म

धर्तीले त्यै भनेर गइन्।

 
नोट: अम्बलुला (Umbellula) समुद्रको सतहमा पाइने एक प्रकारको झार हो |-खसखस डट कम

Comments

सम्पर्क माध्यम

khasskhass@gmail.com
Share |