हालसालैका लेखहरु : आव्हान,(रजनी श्रेष्ठ) ग्रीन कार्ड,(सुदीपभद्र खनाल) लश्कर,(गोविन्द गिरी प्रेरणा) अभिनन्दन !!!!,(ऋषिराम अर्याल) गड्यौला उर्फ सत्यराज ,(कृष्ण बजगाईं ) बोर्डरसाइटको बब्लु,(नीलम कार्की निहारिका) समुद्र र सपना,(संजु बजगाईं ) कार्लोस मेरो दर्पण छायाँ,(सुन्दर श्रेष्ठ) मैले नजन्माएको छोरो,(पारिजात) विदेसिनु रहर कि बाध्यता,(जेबी खत्री)

आत्मबोध

नरबहादुर दाहाल, (दार्जीलिङ)


अहिले म

पसारिएको छु....

यहाँ

शरशैय्यामाथि

निश्चल, निचेष्ट, निर्विकार

जीवन-संघर्षमा ।

 

छैन आज मेरो जीवनमा

उत्कर्ष ।

न छ कुनै

हर्ष -अमर्ष ।

लागेर बाण

आफ्नै आफन्तहरुको ।

इष्टमित्र

वन्धु-वान्धवहरूको

 

अपमान  लाञ्छना,

तिरस्कार

क्षोभ विक्षोभको ।

जर्जर छ देह यो

लागेर आघात ।

माया गर्नेहरूको

विश्वासघात ।

 

तर

अहिले म मर्दिन !

मलाई पनि छ

वरदान ,

स्व-इच्छा मृत्युको ।

भीष्मपितामह जस्तै

उत्तरायण पर्खिरहेको छु ।

यो जीवन कुरूक्षेत्रमा,

सोचिरहेछु

सुतेर यहाँ....,

चाहिएको छ

मलाई पनि अब

आफ्नो सिद्धान्तको

एक सबल प्रतिद्वन्दी ।

जसले

मेटाइदेओस मेरो प्यास ।

 

आस्था र विश्वासको

आशा र आकांक्षाको

श्रद्धा र प्यारको

अर्जुनले जस्तै

छेडेर बाण

यस पृथ्वीको गर्भबाट ।

Comments

सम्पर्क माध्यम

khasskhass@gmail.com
Share |