सुन्दैमा अनौठो र अपत्यारिलो लाग्छ । हुन पनि कुनै व्यक्ति विशेषको कार्यक्षमता र प्रतिभालाई मध्यनजर गर्दै रेकर्ड राख्ने गिनिज वुकमा नेपाल राष्ट्रकै नाम रहन सक्ने भए पछि त्यो भन्दा अपत्यारीला अरु हुनै सक्दैन् । तर पनि नेपाली जनता मख्ख नपरे हुन्छ किनभने राम्रो प्रतिभा र चर्तिकलाकासाथ नेपालले गिनिज वुकमा नाम लेखाउँन सक्ने हुंदै होइन । उल्टै बदनाम कमाउँने खालको नाम लेखाउँन सक्ने तागत भएको हुंदा नामको अगाडी बद थपेर बदनाम कमाउँने मात्रै हो । नेपालसंग गिनिजवुकमा नाम लेखाउन सक्ने तागत, योग्यता, क्षमता र आधार प्रशस्तै छ । गिनिज बुकमा नाम लेखाउन विश्वलाई आश्चर्यजनक र अपत्यारिला कुरालाई यथार्थमा उतार्न सक्नु पर्छ । नेपाल आमाकै कयौ सन्तानले यस्तो आश्चर्य गरेर नाम लेखाउन सफल भएका पनि छन् । यो समग्र नेपालकैलागि गर्वको कुरा पनि हो । हामीले भर्खरै एउटा दुःखद समाचार पनि सुन्नु परेको छ । विश्वकै होचा व्यक्तिको रुपमा चित्रित खगेन्द्र थापा मगर भर्खरै गिनिजवुकबाट बाहिरिएको छ । यसलाई यसरी सोचौ कि खगेन्द्र पनि होचा हैन ठुला भईसकेछन् । विर गोर्खालीको शिर उच्च भए झै । कुनै नेपालीले गिनिज वुकमा नाम लेखाउँदा समग्र नेपालकैलागि गर्वको कुरा हो भने स्वयं नेपाल मुलुककै नाम लेखाउने हो भने त अझ चमत्कारी कुरा हुने नै भो नी होइन र ?
नाम कमाउन मान्छेले अनेकौ नाटक रच्छन्, राम्रो मात्र होइन नराम्रो काम गरेर समेत चर्चामा आउन खोज्नेहरुको जमात कमिलाको ताँती झै उभिएको छ । बद्नाम भएर नाम कमाउनु भन्दा सज्जन भएर नाम कमाउनु कयौ गुण ठुलो कुरा हो । तर नेपाललाई नाम कमाउन यस्तो बहाना गरिरहनै पर्दैन । धेरै आधार छन नेपालसंग गिनिज बुकमा नाम लेखाउँने । कोही लामो समय पढेर नाम लेखाएका छन्, कोही धेरैवटा टेनिस बल लामो समयसम्म हातमा राखेर रेकर्ड बनाउँछन् । कयौ अझै प्रयासरत छन् । त्यसैले तपाई पनि सोचिहाल्नुस कतै संसारमा कोही कसैले नग¥या आश्चर्यचकित काम पो फेला परिहाल्छ कि । यसरी फेला प¥यो भने त नाम लेखाउने काइदाको आइडिया भै गो नि ।
     पत्रिकामा नाम निकाल्न त कत्रो कत्रो जुक्ती लाउने मानवजातीलाई गिनिज बुकमा नाम लेखाउन पाए कसैले छोड्छ ? असंभव । तर कता कता मलाई भने नाम लेखाउने मनै छैन । किन भनेर सोधिरहनै पर्दैन किनकी मलाई बिना कारण ९१ लाख पैसा फिर्ता गरें भन्न आउँदैन । हडी नभएको जिव्रो लत्पतिए पनि यस्तो कुराले रेकर्ड राख्दैन । कता कता गिनिज बुकवालाको नजर नेपालतिर नपुगे जस्तो लागो मलाई त । नत्र नेपालाँ त्यस्तो चमत्कारी घटनाहरु दिन दुगुना रात चौगुना बढि रा छन तर किन राख्दैन यस्तो ऐतिहासिक चमत्कारी कुराको रेकर्ड ? हुन पनि नेपाल जस्तो गणतन्त्रको नाममा मनपरितन्त्र चल्ने देशले रेकर्ड राख्ने भए पो यस्तो कुुराको ख्याल राख्नु त होइन ?
कंहि न भा को जात्रा हांडीगाँउमा भन्या जस्तो लामो समयसम्म कामचलाउ सरकार, लामो समयसम्म मन्त्रिविहिन मन्त्रालय, बिना विभागिय मन्त्रिमण्डल, सरकारै पिच्छे नौलो कर्मचारी, सेनैसेनाको देश हेर्नुस त गिनिजबुकमा नाम लेखाउने आधार, कति छन कति । गनेर र भनेर त साध्य छैन यो त केही समय वजीः उदाहरण पो त । जताततै सेनाकै खैलावैला, जनमुक्ती सेना, नेपाली सेना, शिव सेना, अव संघीयतासंगै मधेसी सेना, नेवार सेना, ताम्सालीङ सेना जम्मै सेना बनेपछि भएन न त सेनामय मुलुक । अर्काे अझ महत्वपूर्ण आधार छ, रक्षक नै भक्षक । सवैको सुरक्षार्थ भनेर खटिएको प्रहरी प्रशासनमै अख्तियारले भोटे ताल्चा लगाए पछि भएन त अचम्म ? त्यस्तै एउटै पार्टी भित्र गुट, उप गुट, गुटहरुको छुट्टाछुट्टै भेला, भेलै पिच्छे चेला, राजनीतिको यस्तो चमत्कारी झेला । हेर्नुस त गिनिज वुकका खुराकहरु ।
    जलश्रोतमा बिश्वको दोश्रो धनी मुलुकका वासिन्दा हामी दिनहु लोडसेडिङ सहेर वस्नु पर्छ । वर्षायाम शुरु हुन लाग्या थे, मन्त्रीज्यूले भनिहाले लोडसेडिङ घट्छ,  अनि हुरुक्क हुन्छौ हामी जनता पनि । पानी परेर हो की युवामन्त्री ऊर्जा मन्त्री भएर हो केही दिनदेखि त लोडसेडिङ पनि हुन छाड्यो फेरी । १० वर्षमा १० हजार मेगावाट विद्युत उत्पादन गर्ने योजना बुन्ने सरकारको आयु नै १० महिना टिक्दैन भने विकास कसरी हुन्छ ? यास्तो कुरा विश्वमा सायदै होला त्यसैले यो पनि गिनिज बुककालागि खुराक बन्न सक्छ । अरु देशका जनता चन्द्रमा ताक्या बेलाँ हाम्रा देशका जनता कतार, मलेशिया, कोरिया, अमेरिका ताक्छन् । हुन पनि हाम्रो दाजुभाईले त्यहां गई पसिना नबगाइ दिएको भए उनिहरुलाई अनुसन्धान गर्ने फुर्सद कहाँबाट आउनु । त्यसैले आफु जोतेर भए नि अरुलाई आकाशाँ उडाउन खप्पिस हामी नेपाली जनता गिनिज बुकमा नाम लेखाउनकालागि योग्य कि अयोग्य ? लौ हेर्नुस त अरु देशका त यदाकदा एक दुइजना रेकर्ड राख्छन हाम्रो त मुलुक नै गिनिज बुकका लागि योग्य जस्तो लाग्यो कसो महोदय ? यसो नाम लेखाउन प्रयास पो थाल्ने कि ?