रोल्पाबाट दुइ समाचार,(खसखस सम्वाददाता)
शर्माको एकल रचना वाचन सम्पन्न
समाचारदाता, रोल्पा साउन ३१ ।
कवयित्री सीता शर्माको एकल रचना वाचन कार्यक्रम शनिबार रोल्पाको लिबाङमा सम्पन्न भएको छ । कार्यक्रममा शर्माले आफ्नो विद्यार्थी जीवनदेखि हालसम्म रचना गरेका १० वटा कविताहरु सुनाइन् ।
कार्यक्रमको समीक्षा गर्दै प्रगतिशील लेखक संघका केन्द्रीय सदस्य गौरीकिरण डाँगीले शर्माको रचनामा प्रगतिशीलता भेटिएको टिप्पणी गरे । कार्यक्रममा शर्माको व्यक्तित्वमाथि कवयित्री गायत्री घर्तीमगरले बोलेकी थिइन् ।
लिबाङस्थित वाचनालयमा कार्यक्रम सम्पन्न भएको हो । ललित साहित्य परिषद् रोल्पाका अध्यक्ष ओम पन्छीको अध्यक्षतामा सम्पन्न कार्यक्रमको सञ्चालन नारायण रेग्मी जिज्ञासुले गरेका थिए ।
ललित साहित्य परिषद्, रोल्पाले कार्यक्रमको आयोजना गरेको हो । मासिक रुपमा सञ्चालन गरिने कार्यक्रम अन्तर्गत यो तेस्रो शृङ्खला हो । यसअघि साहित्यकार खेमराज शर्मा र डी.बी. टुहुरोको एकल रचना वाचन सम्पन्न भएका थिए ।
XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX
प्रलेसको स्थापना दिवसमा २ पुरस्कार वितरण गरिने
समाचारदाता, रोल्पा साउन ३१ ।
प्रगतिशील लेखक संघको स्थापना दिवसको अवसरमा २ वटा पुरस्कार वितरण गरिने भएको छ । प्रगतिशील लेखक संघ रोल्पाको शाखाको लिबाङमा सम्पन्न बैठकले दिवसका अवसरमा तिलकराम–रिमाल्नी साहित्यिक प्रतिभा पुरस्कार र पल्लवी गजल साधना पुरुस्कार वितरण गर्ने निर्णय गरेको हो ।
साहित्यकार खेमराज शर्माद्वारा स्थापित तिलकराम–रिमाल्नी साहित्यिक प्रतिभा पुरस्कार हरेक वर्ष एक जना स्रष्टालाई प्रदान गरिने छ भने साहित्यकार धनराज अविरलद्वारा स्थापित ‘पल्लवी गजल साधना पुरुस्कार’ एकजना गजलकारलाई प्रदान गरिने छ ।
रोल्पा शाखा अध्यक्ष नवीन लोचनमगरको अध्यक्षतामा सम्पन्न बैठकले नेपाली साहित्य तथा पत्रकारिता क्षेत्रमा प्रगतिवादी धारामा कलम चलाउने व्यक्तित्वहरुको सम्झनामा जन्मदिन र स्मृति दिन पारेर मनाउने निर्णय गरेको छ ।
यसैबीच अग्रज साहित्यकार तथा समालोचक एवम उपन्यासकार दीपशिखाको भर्खर प्रकाशित प्रगतिवादी उपन्यास ‘रात फुलको याम’को चर्चापरिर्चा कार्यक्रम भाद्र १ गते रोल्पाको लिबाङमा गर्ने निर्णय गरेको छ । बैठकमा प्रलेस केन्द्रिय सदस्य गौरीकिरण डाँगीसमेत उपस्थिति रहेको थियो ।