नयाँघरेको डलरको डायरी विमोचित,(खसखस डट कम समाचारदाता )
काठमाडौं । १७ साउन, २०७१
नियात्राकार युवराज नयाँघरेको 'डलरको डायरी' नियात्रा संग्रहको विमोचन सम्पन्न भयो । राष्ट्रकवि माधव घिमिरेले उक्त नियात्राको विमोचन गर्नु भएको थियो ।
विमोचित कृति माथि आफ्नो मन्तब्य राख्दै घिमिरेले भन्नुभयो– ‘विशिष्ट भाषा र शैलीको जादुगरी लेखन डलरको डायरीमा छ । यो कृतिले नेपालीलाई अमेरिकाका सबै खाले तस्वीर देखाउँछ ।’
घिमिरेले प्रशंसा गर्दै भन्नुभयो– ‘सुक्तिमय भाषा र नेपाली भाषाको सुन्दरताको चोखो नयाँपनको लागि नयाँघरेको लेखनी पढ्नै पर्छ ।’
विमोचित कृतिको समिक्षा गर्दै डा. नारायण चालिसेले भन्नु भयो– ‘अमेरिकाको नदेखिने तस्वीरलाई यहाँ लेखकले उतारेका छन् । यो कृतिले यात्रा लेखनको परम्परागत धारणा भत्काएको छ । कला र शैलीको उच्चतम् नमूना यहाँ भेट्न सकिन्छ ।’
कृतिकार नयाँघरेले लेखनमा विविधताकै कारण यो कृति लेखेको हूँ भन्नु भयो । नयाँघरेले अमेरिकाको भौतिक विकास मात्रै होइन, दक्षिणपूर्वी एशियाको चरित्रलाई उतार्न यो कृतिमा मेरो प्रयास भएको छ ।
समारोहमा सुरेश श्रेष्ठ, मणि लोहनीले पनि बोल्नु भएको थियो । रत्न पुस्तक भण्डारद्वारा प्रकाशित उक्त पुस्तकमा २७ वटा नियात्रा रहेका छन् । मदन पुरस्कार विजेता नयाँघरे झर्रो र ठेट लेखनशैलीका कारण लोकप्रिय लेखक मानिन्छन् । उनका यस अघि नै १२ वटा निबन्धका पुस्तकहरु आइसकेका छन् ।
