फ्लोरिडामा फुल्दा ,(विटु के सी बराल)
न्यानो मौसम , मिठो हावापानी , हरियालीको खानी फ्लोरिडामा पुग्दा मन त रमाइलो भयो नै । शरीर हलुको , मन चङ्गा उडे उडे जस्तो, आफै त्येतै फुले जस्तो पो लाग्यो । साहित्यिक यात्राका सह्रदयी साथी सुन्दर जोशीजीको हार्दिक आत्मियपनमा रमाइरहेका थियौ हामी । ताराजीको कलेजका साथीहरू बिजय कट्टेलजी र पुष्प प्रधानजीसँग अचानकको भेट र न्यानो आतिथ्यले फ्लोरिडा भ्रमणमा अझ बढि निखार आयो । साहित्यिक कार्यक्रममा सरिक हुन नपाएको भए फ्लोरिडा घुमाइको त्यो हदसम्मको आनन्द प्राप्ति पक्कै हुने थिएन । प्रख्यात गायिका मिरा राणा र प्रसिद्द लोक गायक प्रेम राजा महतजी, सुन्दर जोशीजी, बिकास देवकोटा लगायत अरु कवि र कवियत्रीहरूको उपस्थितिमा सहभागी भैरहदा मेरो अन्तर्मनको कवि ह्रदय पुलकित भैरह्यो । ह्युस्टनको ब्यस्त र बोझिलो जीवनबाट केही समय सुस्ताउन छाहारीको खोजिमा निस्केका हामि दुबैले फ्लोरिडाको तालाहासी, वेस्ट पाम वीच, मायामी र ओर्लान्डोमा धेरै शीतल र सुस्ताएको महसुस गर्यो ।
साँस्कृतिक कार्यक्रमकोलागि उर्जा स्थल रहेछ फ्लोरिडाको वेष्ट पाम बीच । सरस्वती पूजा , नेपाली स्कूल, भानु , लेखनाथ र लक्ष्मी जयन्ती जस्ता कार्यक्रमहरू २३ घण्टाको ड्राइभबाट आइ नेपालीहरू जमघट भएर बडो उत्साहपुर्बक मनाउदा रहेछन् । यो देखेर औधी खुशी लाग्यो हामीलाई । लेखनाथ जयन्तीको अबसर पारेर अन्तराष्ट्रिय साहित्य समाज फ्लोरिडा चाप्टरको साहित्यिक कर्यक्रममा सरिक भएर कबिता वाचन समेत गरियो । सोही कार्यक्रमबाट आइएनएलएस फ्लोरिडा नयाँ निर्वाचित कार्य समितिको घोषणा पनि गरिएको थियो ।
हाम्रो भ्रमणको अर्को ऐतिहासिक रमाइलो पाटो त उजागर गर्न बाँकी नै छ । कुरा के भने - बाहिरबाट आउनुभएका पाहुनाहरूलाई ब्रेक फास्टको निम्तो थियो हरि पान्डेजीको घरमा । महामहिम प्रेमराजा महतजी, प्रख्यात लोकप्रिय गायिका श्रीमान श्रीमती मिरा राना, ताराजी र म , श्रीमान श्रीमती हरि पाण्डे , सुन्दर जोशी, कृष्ण श्रेष्ठ , बिमल नेपाल र सृजना नेपाल जम्मा भएका थियौं । लेक नजिकैको त्यो झलमल्ल सुन्दर बिहानीमा शायद सबैको मन फूल जस्तै फुलिरहेको थियो । अचानक सुन्दरजीले प्रस्ताव राख्नु भयो - हामीले गर्ने भनेको कोठे कवि गोष्ठीको आजैबाट शुरुवात गर्दा कसो होला ? सबैले साह्रै राम्रो मान्दै सहर्ष स्विकार गर्यौ । महामहिमले सुझाव दिनुभयो कोठे कवि गोष्ठी भन्दा कवि घर भन्नु उपयुक्त हुने । सबैलाइ चित्त बुझ्यो । अनि त सुरु भयो हाम्रो साहित्यिक वातावरण । हामी त्यो रमाइलो साहित्यिक जमघटको रसस्वादनमा चुर्लुम्ब डुब्यौं । कवि घरको एतिहासिक स्थापनासंगै खुशीले बिभोर भएर संसार प्रसिद्द मायावी नगरी मायामी वीचतर्फ लाग्यौं ।
मायामी वीचबाट सूर्य उदाउँदा र अस्ताउँदाको झलक गजवको हुँदो रहेछ, रोमान्चित बनाइदियो । मायामीबाट ओरलान्डोमा रहेको एनिमल किङडममा सगरमाथा, कालिगण्डकी, पशुपतिको झलक हेर्दै अचम्म मानेर फर्कियौ । ओरलान्डोमा श्रीमान श्रीमती विकास देबकोटाको आत्मिय आथित्य अर्को सुखद पक्ष रह्यो । फ्लोरिडाबाट फर्किदा बाटोमै पर्ने अलाबामा र लुजीयानाको न्यू ओर्लिएंस घुम्दै टेक्सासको हाम्रो बासथलो ह्युस्टन आइपुग्यौ । यहाँ आइपुगेको तीन दिन भैसक्दा पनि म चाँही फ्लोरिडाको रमाइलो ह्याङओभरबाट फुत्किएकी छैन । सुन्दरजी, बिजयजी र हरिजीको त्यो मनमोहक सुन्दर लेक संगैका घरहरू, फ्लोरिडाको मीठो मौसम, हरियाली, सफा सुकिलोपनले मेरो मन अझै उतै तानिरहेकोछ । हप्ताभरको छोटो समय भएपनि रमाइलोका तरङगहरूले मेरो मन फ्लोरिडामा फुलेको झै महसुस गरेँ मैले ।