हालसालैका लेखहरु : ग्रीन कार्ड,(सुदीपभद्र खनाल) लश्कर,(गोविन्द गिरी प्रेरणा) अभिनन्दन !!!!,(ऋषिराम अर्याल) गड्यौला उर्फ सत्यराज ,(कृष्ण बजगाईं ) बोर्डरसाइटको बब्लु,(नीलम कार्की निहारिका) समुद्र र सपना,(संजु बजगाईं ) कार्लोस मेरो दर्पण छायाँ,(सुन्दर श्रेष्ठ) मैले नजन्माएको छोरो,(पारिजात) विदेसिनु रहर कि बाध्यता,(जेबी खत्री) ना....टक,(बासु श्रेष्ठ )

म अर्थात् पराजित वर्तमान

गीता त्रिपाठी, (काठमाण्डौं)


कुनै दिन थियो

प्रश्नविहीन थिए तिम्रा आँखाहरु

उत्तरै-उत्तरले पूर्ण थिए मेरा ओठहरु

 

कुनै दिन थियो

अहँ थिएन तिमीसँग

मेरानिम्ति कुनै प्रश्नै थिएन

न्यानो घाममा निदाएको

बालक-शान्तिजस्तो

मैभित्र निदाउँथे मेरा उत्तरहरु

 

आज यो दिन छ

तिमी प्रश्नैप्रश्नको सूचीपत्र छौ

प्रश्नार्थक छन् तिम्रा आँखाहरु

प्रश्नार्थक छन् तिम्रा दृष्टिहरु

प्रश्नार्थक छन् तिम्रा सोचहरु

 

आज यो दिन छ

उत्तरविहीन छन् मेरा ओठहरु

उत्तरविहीन छन् मेरा आवाजहरु

उत्तरविहीन छन् मेरा अनुभूतिहरु

 

मौनताका चाङ खोतलिरहेछ इतिहास

कोलाहलबीच सुतिरहेछ वर्तमान

मौनता र कोलाहलबीचको विन्दुमा

म अलिकति उज्यालो पर्खेर थाकेकी छु  

 

सारा प्रश्नहरुबाट आजित

सारा उत्तरहरुबाट विभाजित

दुखिरहने घाउ भएको छु म

अनन्त अँध्यारोबाट पराजित

 

Comments

सम्पर्क माध्यम

khasskhass@gmail.com
Share |