फूल र काँढा
गोविन्द गिरी प्रेरणा, (मनासस, भर्जिनिया, अमेरिका)
फूलको वस्तीमा आएर
काँढाले सोध्यो
वास पाउन सकिन्छ कि
फूल त फूलै हो
स्वभावैले सुकोमल
वास दिन मंजुर भयो ।
एकदिन काँढाले भन्यो
वास त पाइयो
साथ पनि पाइन्थ्यो कि
फूल त फूलै हो
हृदयले स्वच्छ पवित्र
साथ दिन तयार भयो ।
वास र साथ पाउने काँढाले
फूललाई घोच्न थाल्यो चिथोर्न थाल्यो
रगताम्य पार्न थाल्यो ।
युगौंदेखि फूल
आफैंले वास र साथ दिएको
काँढाको पीडा खपिरहेछ
निरन्तर खपिरहेछ ।
१८ डिसेम्वर २०१०