गीत
शिव प्रकाश, (बोष्टन)
जहाँ म जन्मे, नेपाली भई, मर्न पाउँ त्यही, नेपाली भएर,
धरतीमा मैले, पहिलो पाइला, टेकेको माटो, छातीमा टाँसेर ।
धरतीमा अर्को, कहाँ छ संसार, हिमाल सधैं, मुस्कुराइरहने ?
छातीमा गुराँस, फुलाई मगमग, सौन्दर्य-सन्देश, फैलाइरहने ,
अविरल बग्छन्, मेची र काली, भातृत्व भाव, फिजाई संसार,
तराई – पहाड, हिमाल सबै, भावना एउटै, एउटै बिचार ।।
विर्सन्न कहिले, काखको माया, कोखको भार, नेपाली भएर
जिन्दगी वितोस्, बिहान सधैं, आँखाले मेरा, नेपालै हेरेर
घरदेश - परदेश, जाँ' रहे पनि, गर्न पाउँ सेवा, नेपाली भएर
स्वर्ग हो त्यही, नेपाल मेरो, मर्न पाउँ आमा, पाउमा छोएर ।।
अक्टोबर २०, २०१०