किस्ताबन्दीको माया
सुषमा मानन्धर, (ललितपुर)
कसलाई रहर हुंदैन र
चखेवा र चखेवी झैं
डुबेर मायामा
एक अर्कालाई नियाल्दै
एकाधिकारसंग
एकलौटी माया पाउने ।
बाध्यताको बर्बर वर्तमानमा
कति विवश छु
तिमीलाई थोकमा माया गर्ने
आफनो रहर समेत
खुद्रामा ढाल्नुपरेको छ ।
मेरो यो
टुक्राहरुमा तिमीलाई
तिर्दै गरेको माया
कति टुक्रामा बांडेकी छु
के तिमीसंग कुनै हिसाब छ
सम्वेदनशील एउटा िसंगो माया
टुक्राटुक्रामा
कुनै व्यापारिक योजनाको
मात्र किस्ताबन्दी बनेको छ ।
अचेल थोकमा माया गर्ने
फुस्रद नै पो कसलाई छ र
हर दिनको भागदौडको नियतिमा
अफिस र घर
घर र अफिस
अलिकति उबारेर समय
माया गर्नु पर्ने बाध्यता ।
तिमीलाई गरिएको मायाको
सम्बोधनमा
तिम्रो प्रतिकि्रया नकुर्दै
ग्यांसको लागि कुर्नु पर्ने
कुद्नु पर्ने
पानीको लागि
बस्नु पर्ने लामो लाइन ।
फेरि भएन
तरकारीको जोहो
भान्छामा तातो लाग्यो । लागेन
हेर्ने को
मनमा रहरको बल्छी थापेर पनि
सखारै उठ्नु पर्छ
कतै धारामै पानी आउंछ कि
तिम्रो अंगालोमा
तिमीलाई मात्र एउटा
हतारको म्वांई
फेरि अर्को किस्तामा चुकाएकी छु ।
सुत प्रिय भोलि चांडै उठ्नु छ
धारामा पानी नआए
फेरि छिमेकी कहां पुग्नु छ
फेरि छिमेकी कहां कुद्नु छ ॥
