२०६५ को शुभागमन!
प्राध्यापक तारानाथ शर्मा, (मिशिगन राज्य विश्वविद्यालय पूर्व ल्यान्सिङ, सम्युक्त राज्य अमेरिका)
(१)
थोत्रो बूढो बितेको असफल ननिको वर्षले राष्ट्र भाँड्यो
मैला च्याङ्ला पुराना रिसघिनफुटका रोग सर्वत्र बाँड्यो
देशै टुक्र्याउने जो सरल जनमा सर्पको खेल चम्क्यो
पृथ्वी नै छट्पटायो र समयसँग मिली लौ नयाँ साल झुल्क्यो
नेपाली एकताको हृदय दह्रिलो पार्न यो साल पाओस्
सारा पाखण्ड फाँड्दै अब त मुलुकमा दिव्यदृष्टि उदाओस्
पैँसट्ठी साल राम्रो अतिशय रसिलो आशको ज्योति छर्छ
सारा हाम्रा गलेका तन र मनमा प्राणसञ्चार गर्छ
