पैसा
चूडा निर्भीक, ( )
पैसा पैसा भन्छ मान्छे दगुर्छ ।
मौका पाए निल्छ पैसा हसुर्छ ।।
पैसा खोजी भाग्छ मान्छे पछाडी ।
पैसा फल्ने बोट हुन्नन् अगाडी ।।
पैसा खोजी गर्छ मान्छे सबैले ।
मर्दा लान्नन् साथ पैसा कसैले ।।
आए दौडी काल नांगै गईने ।
जम्मा गर्छौ व्यर्थ लोभी भईने ।।
पैसा साथी बन्छ बन्दा बिरामी ।
पैसा थुप्रो राख्नु हुन्नन् सिरानी ।।
पैसा बन्ने चोरको त्यो भकारी ।
डाँका गर्ला ज्यान मार्ने तयारी ।।
पैसा ज्यादा मिल्छ मान्छे बिगार्छ ।
पैसा ठीक्कै ताक्नु मान्छे सपार्छ ।।
पैसा देख्दा देव का तीन नेत्र ।
पैसा खोजी बिक्न जान्छन् चरित्र ।।
लाग्दा ज्यादै भोक पैसा नखानु ।
खन्दै खाल्डो भित्र हुन्नन् नजानु ।।
पैसा गन्दै ज्यान फाल्नै हुँदैन ।
पैसा मात्रै खास त्यो देखिदैन ।।
पैसा छैनन् बाँच्न पर्छन् समस्या ।
औधी खोज्दै गर्छ लोभी तपस्या ।।
पैसा जम्मा गर्न टाढा नजाऊ ।
नेपाली हो राज्य आफ्नै सजाऊ ।।
छन्दः शालिनी ११ अक्षर ४ अक्षरमा विश्राम ।
