हाम्रो हस्तिनापुर
हरि पौडेल , (नेदरल्याण्ड )
किन गर्ने सत्यको खोजी ?
म पागल हुँ र ?
यो हाम्रो हस्तिनापुर हो,
कलियुगको हस्तिनापुर,
युधिष्ठिर बिना,
बिना कृष्णको हस्तिनापुर,
यो कलियुगको कंशको राज्य हो
कृष्णलाई जन्मिन कहाँ दिन्छन र ?
मारी हाल्छन् नि !
यहाँ दुःख पाउने पाण्डवहरु होइन !
कौरवहरु हुन,
पाण्डवहरु त बर्षों देखि
हस्तिनापुरमा राज्य गर्दै छन,
यहाँ शकुनि मामाहरुपनि पाण्डवहरु कै वरी परी छन,
कौरब त फुटपाथमा रन्थनिएर डुलिरहेका छन,
जागीर खाने लाइनमा छन,
पॅंधेरामा पानी थाप्न पर्खी बसेकाछन्,
पाण्डवहरु कहा बत्ती पनि छ
पानी पनि छ,
कौरवहरु कहा कहिले बत्ती छ कहिले छैन,
कहिले पानी छ कहिले छैन,
तर कस्तो संयमी !
जे गरे पनि सही बसेकाछन्,
आउला ! राम्रो दिन आउला !
कृष्ण त जन्मेनन
राम जन्मेला !
व्दापरमा केहि भएन
त्रेतामा केहि होला !
हरे कौरव ! कस्तो संयमी !
०२-०२-२०१४
Comments
Hari
मेरो रचनालाइ आफ्नो वेब साइटको योग्य सम्झी दिनुभएकोमा खसखस परिवार प्रति आभार प्रकट गर्दै हार्दिक धन्यवाद् टक्र्याउद छु.
