हालसालैका लेखहरु : ग्रीन कार्ड,(सुदीपभद्र खनाल) लश्कर,(गोविन्द गिरी प्रेरणा) अभिनन्दन !!!!,(ऋषिराम अर्याल) गड्यौला उर्फ सत्यराज ,(कृष्ण बजगाईं ) बोर्डरसाइटको बब्लु,(नीलम कार्की निहारिका) समुद्र र सपना,(संजु बजगाईं ) कार्लोस मेरो दर्पण छायाँ,(सुन्दर श्रेष्ठ) मैले नजन्माएको छोरो,(पारिजात) विदेसिनु रहर कि बाध्यता,(जेबी खत्री) ना....टक,(बासु श्रेष्ठ )

उमेर

नीरा शर्मा, (फेयरफ्याक्स, भर्जिनीया)


न मैले दिनलाई रोक्न सकेँ

न रातलाई छेक्न सकेँ

बगिरह्यो समय निरन्तर

मैले मात्र पछ्याइरहेँ

लाग्थ्यो

छाता ओडेर घाम छेकेँ

बाँध बाँधेर खोलो रोकेँ

पर्खाल लाएर वतास छेकेँ ।

 

तर गलत रहेछु म

आँफ्नै गतिमा

हिडिरहेको रहेछ घाम

बगिरहेको रहेछ खोलो

चलिरहेको रहेछ वतास

छाताले केवल घामको

ताप छेकेको रहेछ

बाँधले केवल पानीको

बेग रोकेको रहेछ

पर्खालले केवल बतासको

बाटो बदलेको रहेछ ।

 

यतिखेर म

रोक्न खोजिरहेछु

घाम, पानी, वतास

जून, तारा, आकाश

र सिंगो समय !

 

हुन त मैले चाहँदैमा

खै कहँ रोकियो र समय ?

बरु समयको बहावसँगै

अरू पनि धेरै कुरा बगे

बैँस बग्यो

उमेर बग्यो

र सम्पूर्ण जीवन नै

घिस्रिदै घिस्रिदै

ओरालो लाग्यो ।

 

लालीको रातो पोत्दैमा

कहाँ फर्किदो रहेछ र बैँस

कपाल रङ्गाउँदैमा पनि त

छेकिदो रहेनछ उमेर ।


तैपनि म

समयको मैदानमा

जीवन नदिसँगै

अबिरल बगिरहने

उमेरको बहावलाई

रोक्न खोजिरहेछु

मनको घरातलमा

सोचहरुको पर्खाल लगाएर ।

Comments

सम्पर्क माध्यम

khasskhass@gmail.com
Share |