नारी रुप
बासु श्रेष्ठ, (भर्जिनिया)
उ एक हजुर आमा
नारीको एक रुप
दिनभर एकाग्र मनले
नाती स्याहार्दै
नुहाई दिई अनि
तेल लगाई दिई
घण्टा घण्टामा
नवजात शिशु नातीलाई
दुध खुवाई
र सुताई ।
तत्क्षण
सुत्केरी छोरीलाई
तेल लगाउँदै
समय समयको खानपिनमा ध्यान दिँदै
तिनको तालिकामा
सजग हुँदै निरन्तरता
दिई नै रहेकी छ अनवरत ।
कहिले पतिलाई के खाने भनेर सोद्धै
र आफुपनि खाँदै
त्यसैगरि
घरका अन्य सबै सदस्यको
स्याहार सम्भार गर्दै
कसैलाई भोकै नराखी
सबैको माग पुरा गर्दै
आजको दिनपनि पुरा गरेकी छे उसले र
रात बढ्न थालेपछि
भर्खर ओछ्यान पल्टिएकि छे ।
न मुहारमा कुनै थकाई
न गुनासो
अपितु
हाँसोले भरिएको
मुहारले
कहिले नातीलाई
कहिले छोरीलाई
भनौँ परिवारका सबै सदस्यप्रति
गर्नुपर्ने सबै कर्तव्य सम्झँदै
पुरा गर्दै
सबैलाई खुशी राखेकी छे
र अब ओछ्यानमा
श्रीमानको चाहना पुरा गर्न तत्पर छे ।
