कविता छैन कविसँग
शिव प्रकाश, (बोस्टन, अमेरिका )
सबैलाई थाह छ–
सबै छ,
सबैलाई यो पनि थाह छ–
ती सबैभित्र केही छैन,
छदैं छैन !
छैन तर छैनमा नै चलेको छ सबै
जस्तै– देश अथार्त छैनको पर्याय
छैन, छैन, छैन !
अधिकता छैनकै छ, व्यापकता छैनकै छ
सघनता छैनकै छ, साम्राज्य छैनकै छ
आहा ! छैन कति धेरै छ हामीसँग ?
मान्छेभित्र मान्छे नभए जस्तै,
देशभित्र देश नभए जस्तै !
छैनै छैन हुँदा पनि सबै छ
सबै भित्र कवि पनि छ
तर आज कविभित्र कविता छैन
दौडाइरहेछ– लम्बेतान शब्दहरुको जुलुस
शब्दहरुको भीडमा शब्द नै हुन्छन्
कविता हुदैन
थाह छैन कविलाई
भीडले कहिल्यै सही बाटो लिएको हुदैन
विम्बहिन छ कवि आज
दिशाहिन देश जस्तै !
के त्यो सत्य बोध कविलाई पनि भयो ?
“अन्ततः केही छैन, शून्यताभित्र शून्य जस्तै !”
(अश्रृंगार कविता अभियान)
अक्टुबर १०, २०१२
Comments
navin aryal
awesome...lines sir....
