कुनै दिन
प्रकाश सायमी , (गोधुली सँसार, ललितपुर )
घामसँग बोलेर हामी कविता पढ्दैछौँ
घामसँग खेलेर हामी कविता लेख्दैछौँ
घामसँग हिँड्दै हामी कविता बाँच्दैछौँ
घामसँग
हाम्रो साइनो छ,
कविताको ।
घाम पर्खालमाथि चढ्छ,
हाम्रो कविता सस्वर हुन्छ
घाम डाँडामाथि हिँड्छ
हाम्रो आवाज अझै प्रखर हुन्छ
पानीसँग पनि हामी लेख्छौँ, पढ्छौँ
र बोल्छौँ
हामी कविता लेख्छौँ घामपानीको
एकदिन हाम्रो कविता घाम बन्ला
सबैलाई न्यानो देला
वा पानी बन्ला,
सबैलाई जीवन देला
फेरि पनि हामी कविता लेखिरहौँला
तर कविता त हामीसितै रहन्छ
कुनै एउटा यस्तो दिन
घाम रहला
पानी रहला
हाम्रो कविता नरहला
तर
हामी घामपानीमा कविता भएर जानेछौँ ।
Comments
kumari lama
literally simple but loaded with philosophy. brilliant piece.
om prakash sharma
khass khass sarai ramro ..
