गजल
नगेन्द्र ईङनाम \"आठराईली”, , ((न्यु योर्क))
जिन्दगीको दोबाटोमा, तिमीलाई हराएर रोएँ
भेटेपछि सपनामा, निद्रैबाट म कराएर रोएँ
बिउँझिएर खोजिहेरें, सुनसान रात साथ थियो
डुब्दैथिएँ तिम्रो यादमा, धोखादेखि डराएर रोएँ
पराईसाथ मिलेपछि, शहरतिर रम्यौ नै होला
म त गाउँकै बनपाखामा, बाख्राबस्तु चराएर रोएँ
एउटै थियो हाम्रो यात्रा, मलाई एक्लै छोडीगयौ
जिन्दगीको एकान्तमा, आँफैभित्र हराएर रोएँ
चोइट्याएर सिङ्गो मुटु, आफ्नो जीवन अर्पण गरें
आफु रहें नदी वारी, तिमीलाई पारी तराएर रोएँ