म के गरुँ?
डा. दुर्गाप्रसाद अर्याल, (काठमाण्डौ )
भावना पोख्न सक्तिन के काव्य सिर्जना गरुँ?
बहाना पार्न सक्तिन म लीला कसरि गरुँ?
जबाफ गर्भमै आफ्नै राखी प्रश्न म के गरुँ
रतिको कामना राखी सतीमा प्रश्न के गरुँ।१
जान्नेभन्दा निहुँ खोज्ने प्रश्न राख्नेहरुसित
सोझो जीवन गाँसेर कसरी हुन्छ के हित
फुराउन म सक्तिन कसरी कविता गरुँ
जुराउनै म सक्तिन मरीहत्ते म के गरुँ।।२
कविता बिचरी मेरी! रुन्छे आज म के गरुँ
जति रोए'नि कविता कोही सुन्दैन म के गरुँ
कविता भावनाको छ शव्दार्थ रुपको तरु
यसको साँध नै छैन बाँध छैन म के गरुँ।
