गजल
मिथिला प्याकुरेल , (भरतपुर, चितवन)
कहाँ खोज्छौ तिमी मलाई तिम्रै आसपासमा छु म
छोएर हेर तिम्रै वरपर बग्दो बतासमा छु म
छाम्न सक्छौ , छु तिम्रै दिलमा , हेर्न सक्छौ हेर आँखा भरी
कहाँ कहाँ भेट्छौ मलाई, तिमीले फेर्ने हर सासमा छु म
जहाँ पुकार्छौ मनले तिमी त्यही हुन्छु म विश्वास गर
जूनमा छु, तारामा छु, साँच्चै सिँगो आकाशमा छु म
सुखमा छु, दुःखमा छु, तिम्रो हरेक भोगाईमा छु
आँतोमा छु, पिठोमा छु तिम्रो हरेक गाँसमा छु म
वन पाखामा छु , छु उकाली ओरालीका तिम्रा सुसेलीहरुमा
पहाडमा छु, खोलीमा छु, पलास, अनि गुराँसमा छु म