सोचाइ
हरि घिमिरे, (भर्जिनिया )
बालुवाभरि मनोकाङ्क्षा समेटेर
पोको पार्दे हिडेको ऊ
पर पुग्दा-हात रित्तै भएछ
वा पोको रित्तै भएछ
उसले दुखेसो मसँग पोख्यो
म पनि त त्यही शिकार भएको हुँ
के सल्लाह दिउँ?
के भनेर बुझाउँ?
उसलाई खाँचो छ-उत्साहको
सकारात्मक सोचको
मैले त येन-तेन मन बुझाएँ
तर ऊ कमजोर रहेछ
अनि बारम्बार घोषणा गर्छ-
रुख-नदी-भीर-दलिन
आगो-पेट्रोल-मेटासिन
भाग्न लागेको हो कि
जाग्न लागेको हो?
ट्यूनिशियाको ‘हिरो’
यस्तै घोषणाको साकाररुपमा
संसार जगायो
विश्व हल्लायो
सिनु जस्तै भएर के पलायन हुनु?
के मेटासिन खोज्नु?