यी आँसुका निर्मल धारा !
नर बहादुर दाहाल , (दार्जिलिंग )
बह यी मनका पोखूँ भन्दा
सम्झी विगतका दिवस ती सारा
थाहा नपाई आई खसेछन् ,
यी आँसुका निर्मल धारा !
भेट भएथ्यो जीवन पथमा
एउटी सुन्दरी परिमल बाला
तर कहिल्यै मिल्न नसक्ने
दुइ नदीका मौन किनारा ।
आज उसैको निम्ति खसेछन-
यी आँसुका निर्मल धारा !
मधुमय पुष्पित प्रणय वाटिका
कस्तो सुन्दर थियो नजारा ,
आँधी-हुरीले ध्वस्त भएछ ,
छिन्न-विछिन्न जग भो सारा ।
पाएँ मैले साथी कस्तो
हृदय नजिक छ तन छ टाड़ा ।
सुखमय प्रणयको दुखमय अन्त-
यी आँसुका निर्मल धारा !
फूल जति सब ओइली सकेछन्
बिझ्छन् मुटुमा केवल काँड़ा ,
अलिअलि अघिको घाउ छँदैथ्यौ
थपिदियौ त्यसमा दुखको ज्वाला ।
यसैले त पलपल खस्छन्
यी आँसुका निर्मल धारा !
सम्झें मैले अब अस्त भएछ
जीवन गगनको भाग्य सितारा ।
यसैले त पलपल खस्छन -
यी आँसुका निर्मल धारा !