लघुकथा-सल्लाह
कृष्ण बजगाईं, (ब्रसेल्स, बेल्जियम)
यो के हो ?
रिबन ।
यो ?
कैंची ।
यो चाहीं ?
पानस ।
कहाँ जाने ?
अमेरिका ।
किन ?
उतै बस्ने गरी ।
पेशा के नि ?
राजनीति ।
........!!!
तपाईंको नाम ?
पासपोर्ट मै छ । त्यहीं हेर्नोस ।
............!!!???
“हजुर यी सबै सामानहरु के गरिबक्सिन्छ अमेरिकामा ?”
“उदघाटन, बिमोचन, भाषणभुषण आदि कार्यक्रम त्यहाँ भैरहलान । प्रमुख अतिथि बनाउलान् । परदेशमा यस्ता सामान कहाँ पाईएलान ? त्यही भएर लैजान लागेको ।”
जाँचकी कर्मचारी जुरुक्क उठेर धनुष्टङ्कार नमस्कार चढायो । उसको ब्याग बोकेर जहाजसम्मै पुर्यायो । जानेबेलमा सुटुक्क भन्यो– “हजुर, मेरो एउटा छोरोले फर्स्ट क्लासमा एम.ए. पास गरेर काम नपाई त्यसै बरालिएर बसेको छ । मिल्छ भने त्यतै तानी बक्सियोस्न ।”
“राजनीतिमा लाग भन्नू !” यतिमात्र सुन्न भ्यायो । जहाजको ढोका बन्द भैहाल्यो ।
.