बिनोद खड्का
दुवाकोट ६, भक्तपुर
हाल: दोहा कतार
जिन्दगी के हो
जिन्दगी एक नशा
केवल एक नशा हो
पियक्कडहरुका लागी ।
जिन्दगी के हो
जिन्दगी एक बहार
अविरल मधुमास हो
नवविवाहितहरुका लागी ।
जिन्दगी एक मजा हो
केवल मस्ती हो
अनि मदहोस हो
जिन्दगीको परिभाषादेखि
अलमलिएकाहरुका लागी ।
जिन्दगी के हो
जिन्दगी एक आँधी
केवल तूफान हो
संकट झेल्नेहरुका लागी
यूद्दग्रस्तहरुका लागी
विपत्तिमा बाँच्नु पर्नेहरुका लागी
न रोकिन्छ न रोक्न सकिन्छ ।
जिन्दगी एक द्धन्द हो
केवल एक द्धन्द हो
पारीवारिक कलह
झेल्नु पर्नेहरुका लागी ।
पीडा हो
आफु वा आफनाहरुका
जीवन रक्षाको आशामा
अस्पताल धाउनु पर्नेहरुका लागी ।
जिन्दगी के हो
जिन्दगी एक विषपान हो
अपमान पिएर
बाँच्नेहरुका लागी ।
जिन्दगी केवल एक खेल हो
नेताहरुका लागी
पासा फेक्नेहरुका लागी
दाउँ थाप्नेहरुका लागी ।
त्यसैले जिन्दगी
केवल एक सम्झौता हो
बाँच्नको लागी
बाँची रहनको लागी
बाच्ने बहानाको लागी
सबै खूसीसाथ बाँच्न सक्छन
जरुरी छैन ।