एउटा अर्को मान्छे

ॠषि राम अर्याल
गागल फेदी -2
काठमाडौं
rishiaryal@hotmail.com


मान्छे समग्रमा मान्छे नबन्दै
मान्छे बन्न दौडिरहेको हुन्छ भुगोलमा
र खुम्चिएको भुगोल नभेट्दै
नक्कली मान्छे प्रतित भैसकेको हुन्छ वर्तमानमा
शताब्दी मान्छेको नक्कलमा ब्यस्त छ
र, आफ्नै उपजका सामु
मान्छे निस्तेज भएकोछ
फगत, निस्तेज
शायद यत्तिमै शताब्दी रोकिदैन होला
इतिहास र बर्तमानका मान्छे
भविष्यमा पाठेघर र टेस्टट्युबममात्र सिमित रहदैनन कि
शताब्दिले पनि त फट्को मार्दैछ
त्यसैले क्लोनिङ्को युगमा मान्छे प्रयोगशालाका उपज हुनेछन
त्यसपछिका बैज्ञानिकबिधिहरु
ब्यस्त हुनेछन मान्छे उमार्न प्रयोगशालामा
खबरदार्
सम्वेदन हराएका मान्छे नऊमार
मान्छे मान्छे जस्तो हुनुपर्दछ
न कि पाखन्डी र मुर्कट्टा जस्तो
यहाँ धेरै भैइसके पाखन्डिहरु
शायद क्लोनिग इतिहासमा त्यस्तो हुदैन होला
उसमा त घाऊ दुख्ने हुनुपर्दछ
पीडा छट्पटाउने हुनुपर्दछ
सम्बेदना जाग्रित हुनुपर्दछ
र जिजिबिषाका प्रत्येक कणहरु सम्बेदनशील हुनुपर्दछ
तब फरक देखिन्छ मान्छे र अर्को मान्छे मा
त्यसपछिका दिनहरु चुनौती हुनेछन मान्छेकालागी
बिबकेहीन र निर्लज्ज मान्छेहरु छटपटाउनेछन
र
बिस्थापित हुनेछन काला सैतानहरु
एउटै अनुहारमा क्लोनिगका मान्छेहरु
बिवेक बाँड्न थाल्नेछन
आफ्नै निर्लज्जतासँग पाठेघरका मान्छेहरु
डराइरहेका हुनेछन
त्यतिखेर पाठेघरका मान्छेहरु पलायन हुँदै जानेछन
जतिखेर क्लोनिग्का मान्छेहरु सम्बृध्द हुँदै जानेछन //